NY TODY

1. Famaritana

Avy amin’ny fototeny hoe “ody” izay manome ny sampanteny hoe “mody”, midika fiverenana any amin’ny toerana niaingana.

Noho izany, ny tody dia fiverenan’ny zavatra natao, na tsara na ratsy, amin’izay nanao azy na amin’ny taranany. Izy no valin’ny asa sy fihetsika nataon’ny olona.

2. Ny Toetran'ny Tody

Mety ho tsara na mety ho ratsy arakaraka ny zavatra natao.
Tsy azo idifiana, andosirana na ivalozana fa tsy maintsy mihatra.
Mety hihatra hatramin’ny taranaka.
Tsy manavakavaka olona na saranga.
Mety efa fantatra mialoha ny fisiany fa tsy fantatra ny fotoana hahatongavany.

3. Ny Vokatry ny Finoana ny Tody

3.1 Vokatra Tsara

Mampirindra sy mampilamina ny fiarahamonina.
Mahatonga ny olona hahay hitondra tena.
Mampirisika ny olona hifanaja.
Mitarika handray andraikitra.
Misakana ny olona tsy hanao valifaty.
Mampieritreritra ny ho avy sy ny taranaka.
Mampisy finiavana hanao ny tsara.

3.2 Vokatra Ratsy

Mety hampionona ny olona ka tsy hiezaka hivoatra.
Misakana ny olona tsy handray andraikitra.
Tsy mampandroso ny tena sy ny fiarahamonina.
Mangeja ny fahafahan’ny olona manao izay tiany.
Miteraka tahotra tafahoatra amin’ny fanapahan-kevitra.
Mety hanome vahana ny mpanao ratsy miandry tody lavitra.

4. Ohabolana sy Ohapitenenana

“Ny tody tsy misy fa ny atao no miverina.”

“Todim-paty aza manody, fa ny todim-pitia manodiava.”

“Todin-karena harena, todim-pitia fitia, todin’aina aina.”

“Ny soa atao levenam-bola, ny ratsy atao loza mihantona.”

“Mpamosavy milevina amoron-dalana ka mahatantesa valin-kitsaka.”

“Ny tody toy ny salaka: soa atao mihodidina, ratsy atao mihodidina.”

“Aza faly am-panaovan-dratsy toy ny mpamosavy ka tsy mahalala ny hasin’ny tody.”

“Maizina ny andro azo tsilovina, lalina ny hady azo toharina, lalina ny rano azo lakanina, fa ny ratsy atao tsy mba azon-kevitra.”

“Tanora ratsy fihary, antitra vao ratsy laoka.”

“Tanora miadam-pihary, maka kitay fotsy volo.”

“Ny mihomehy lavo aza misy todiny.”

“Mandrora mitsilany ka mahavoa tena.”

5. Tenin'ny Mpandinika

R.P. RAHAJARIZAFY

“Ny tsiny mbola azo sorohina, fa ny tody tsy misy fanefitra.”
“Tsy maintsy mahasoa ny tsara fanahy ny ataony, ary mahavoa ny ratsy fanahy koa ny ataony.”
“Ny nataonao tamin’ny hafa tsy maintsy hitody aminao.”

FETY Michel

Na dia tsy ny tenany aza no handray ny valiny dia mety ho ny taranany no hijinja azy.
Ny taho-tody no isan’ny niaro ny Malagasy tsy hanao ratsy olona loatra.
Ny ratsy atao dia mitera-boka-dratsy eo amin’ny fiainana.
Ny sasany mihevitra ny tody ho finoanoam-poana, nefa maro no mino ny fisiany.

E.D. ANDRIAMALALA

“Ny tsiny sy ny tody dia arofanina mba tsy hianjerana amin’ny fanjakan’i Baroa.”
“Tsy misy firenena afaka hivelona am-pilaminana raha tsy misy zavatra hajaina sy atahorana.”
“Manana mpitsara tsy mety diso amin’izay hataoko aho: Andriamanitra sy ny vahoaka ary ny tsiny sy ny tody.”

RANDRIANJOANIMANANA Olivier

“Manome vahana ny mpanao ratsy ny fiandrasana ny tody mbola ho ela.”

Paul RAMASINDRAIBE

“Mivaly amin’ny fotoana tsy andrasantsika hivaliany ny tody.”
“Izay nataon’ny tena tamin’ny hafa, avalin’ny tody amin’ny tena kosa.”
“Indraindray efa taranaka maro vao miseho ny tody.”

Ny Fetran'ny Tsiny sy ny Tody

Araka ny voalazan’i FETY Michel, misy ireo mihevitra ny tsiny sy ny tody ho finoanoam-poana.

Raha misy maty tanora dia mety lazaina avy hatrany fa tsinin-dray aman-dreny, nefa mety misy antony hafa.
Raha misy very vola amin’ny varotra dia mety heverina ho vokatry ny tsiny, nefa mety ho tsy fahaiza-mitantana ihany koa.
Tsy voatery hiverina amin’ny tena mandrakariva eto an-tany ny zavatra rehetra atao.
Misy olona hita fa tsy maty manota eo amin’ny fiarahamonina.

Koa ilaina ny mandinika am-pahendrena ny finoana ny tody: manampy amin’ny fanabeazana sy ny fitandroana ny fihavanana izy, nefa tsy tokony hanakana ny olona handray andraikitra sy hikaroka ny tena anton’ny zava-mitranga.

<== Miverina